【突然又已一年】四電一腦 回收舊機小貼士

自從上年8月政府推出「四電一腦」生產者責任計劃，廠商，品牌商，批發商，零售業界由計劃實施初期嘅擔憂同混亂，經過一年時間嘅磨合，業界都開始習慣而且運作暢順，據CHECK價向商戶了解，回收計劃有得有失，得嘅就係收舊機唔洗特登另收客人掉機費，客人較為接受，而失嘅就係以往商戶可以拎回收返黎嘅舊機賣返出去街邊回收商，可以收返少少零用錢，但而家差唔多清一色只能由政府委託及資助嘅持牌回收商歐綠保包攬晒，同埋回收服務最快都要等3個工作天，雖則幾乎無放過飛機，但如果回收日期同時間可以再靈活啲就更加好。

總括黎講，整頓回收業，集中同系統化處理，踢走因處理不當而污染環境嘅無牌回收商，對香港環境係一件好事。

整合商戶比我地嘅資訊，當消費者購買電器產品時，我地有幾點想提醒大家。

消費者需知:

1.所謂四電一腦，其中包括嘅電器種類有:

雪櫃$165
電視機$165
冷氣機$125
洗衣機$125
顯示屏$45
掃描器$15
影印機$15

2.一般係銷售商購買產品嘅時候，其實上述費用已經強制加左係產品價格上。

3.係落單個陣，商戶一般會提供兩種回收方案

方案一: 由政府委託及資助嘅歐綠保免費回收，最少3個工作天。
方案二: 由商戶或產品供應商直接回收，通常都可以即日收走，但就視乎商戶有機會另外收費，簡單講，係大型連鎖店買，一般都會包埋，因為機價較高cover到，而中小型商戶通常就會有額外費用，一般約$80-$100不等，但當然機價相應平返。

所以好睇消費者本身有無時間或空間而選擇合適嘅方案。

3.無論消費者選擇邊一種方案，商戶都有責任事先提醒消費者，你地享有免費舊機回收服務，而如果選擇方案一，商戶絕不能收取額外回收費用，無論要搬上搬落幾多層，都唔應該有額外費用，否則即屬違法，以下為資料參考:
https://hk.on.cc/hk/bkn/cnt/news/20190930/bkn-20190930161001792-0930_00822_001.html

4.當購買四電一腦計劃所包含嘅產品種類時，要留意銷售商有無提供類似以下嘅label貼紙，一般都會跟住張單或跟住部機。如銷售商無提供，亦屬違法，以下為資料參考:
https://news.now.com/home/local/player?newsId=342539

環保標籤相片:

5.如需要回收洗衣機或冷氣機，用戶需先拆除所有喉管，電線接駁，安裝架之類，簡單講，佢地只係會幫你搬走，但唔會做任何拆卸工程，比錢都唔做。真係唔識拆咁點算? 可以選擇方案二。

6.如需要回收雪櫃，收走舊機同送新機時間要夾得好，尤其當雪櫃裡面仲有好多貴重食材需要雪住，萬一收機人員先到，收左部舊機先，但部新機又未送到，咁就大件事，所以我地建議消費者如果地方同時間容許，而又有貴重食材要雪住嘅話，最好就約下一個工作天嘅早上先收走舊機，否則就要事先食晒你雪櫃裡面嘅野。

7.無需等人黎收舊機，其實你放部舊機係門口，當然唔好阻住鄰居同需要管理處容許，再貼返張”等回收”嘅字條係機面就可以。

8.如果miss左本身約好嘅回收服務，若商戶用返同一個地址或申請單號再同你申請回收服務，歐綠保電腦系統會張你張單推後到1-2個星期後，或有機會取消申請。咁點算呢？可以搵商戶幫幫手, 改下個地址及申請單號(例如: 填上不存在嘅門牌號數) ，佢地搵唔到你自然會打比你，咁就可以係返３個工作天內完成到，當然最好唔好失約，始終回收工作都係一件幾體力勞動嘅工作。如果商戶幫你唔到, 其實可以直接打去歐綠保預約回收，電話: 26768888, 但如果唔係商戶幫手預約的話, 預約嘅時間會比較耐。

題外話:

我地CHECK價簡單咁CHECK過歐綠保公司，發現原來係由德國公司歐綠保集團同本地上市公司綜合環保集團(上市編號:0923)嘅合資公司，都算十分有實力，而且背景雄厚，唔怪得政府大大力SUPPORT ，每年資助兩億:)
據我地搜集得黎嘅資料，綜合環保集團亦有負責回收某幾間銀行巨頭嘅機密文件。

“關於歐綠保綜合環保(香港)有限公司

歐綠保綜合環保(香港)有限公司(歐綠保)是由德國回收專家歐綠保集團及本地固體廢物管理專家綜合環保集團共同創立的合資公司。

香港政府與歐綠保簽約，委託我們設計及興建廢電器電子產品處理及回收設施－WEEE·PARK，並提供回收服務及營運該設施直至二零二七年。廠房採用由歐綠保集團提供的先進科技，將雪櫃、電視、電腦、洗衣機及冷氣機內含的有害物料進行無害化處理，令電子廢物轉化為寶貴的二次原料。