【網購避險】購物程序大拆解

大家睇啱心水電器產品，都會先上網格一格價，搵下邊到買最平。但係點樣選擇一間好嘅舖頭? 就等我地逐個逐個point講解:

店鋪選擇:
無門市，無地址提供，得手機號碼或者只用電郵同你聯絡嘅店鋪就盡量避免。如果真係無計，而佢地價錢對比其他舖頭差成一千幾百，客人就最好選擇要求貨到付款，如要先付訂金，建議以銀行戶口轉帳小量訂金，切勿用現金轉帳，有咩事上黎起碼有紀錄；如果價錢只係相差一百幾十，就建議搵返間有門市有地址嘅鋪頭，有起事上黎都知應該去邊度找晦氣。記住唔好學羅志祥，格價還格價，唔好濫問，避免一次過send mass messages十幾二十間鋪頭，原因係網上搵鋪頭就好似行左入黃金電腦商場咁，明明唔同鋪位，唔同名，到頭黎原來都係同一間公司。如果舖頭發現見到客人周圍格價，舖頭一來會失去向你認真報價嘅意慾，會是但講個流嘅價錢俾你，到頭黎得到嘅報價更加無質量。

標價不同售價:
網上標價同最終售價係有機會唔一樣，原因係有舖頭先標低價吸引客人，要查詢之後先知有額外收費。

以下係少少節錄, 下面對話中可以見到好多時候問清楚先知道運費原來要加$100-$200不等, 同埋環保標籤費有時候都唔包係標價入面, 所以唔好見到標價就以為係最終售價, 要問清楚!

想摸真啲件貨:
想睇產品實物，建議大家先去大型連鎖店或品牌陳列室睇清楚，問清楚，先再返小店購買。礙於空間大細，小店十居其九都唔會有擺你心目中嗰隻型號Display。

現貨問題:
客人幫襯小店，最好預左要訂貨，等2-3個工作天左右，尤其係非熱門產品，小店通常都係賣一隻，入一隻。如果想即買即取貨，就要俾多少少精力，搵搵邊間有現貨提供。

適度分散投資:
買野幫襯最抵嗰間係人之常情，但如果你要買全屋電器，就唔好10件電器，分開9間買，最好集中返2至3間以內，一來方便你夾返送貨同安裝服務同時間，二來頭一兩個星期你都仲可能記得邊件電器打邊間鋪頭，但日子耐左就有機會忘記，到時無左張單做保養，就唔知搵返邊間補俾你。當產品涉及安裝，件貨同安裝就最好搵返同一間公司負責晒，日後有手尾跟，就可以避免雙方互相推卸責任，安裝師傅就賴部機有問題，鋪頭就賴個安裝有問題。

決定訂貨:
購買前最好確實產品貨期，如果代理有貨，一般都係2-3個工作天就送到貨。如果客人等得，或店鋪講明番貨等候時間要較長，建議客人先俾小量訂金，收貨後先全數付清。

大型零售鋪同小店貨源係咪一樣？
如果講明係原裝行貨，連銷店同小店都一定係同一貨源。例如買樂聲洗衣機，就一定係信興代理保養，買金章就一定係大昌行代理保養。

唔知尺寸唔好亂買:
客人要確保送貨途中通道夠位，擺放位置適合你所選購買嘅機種，如果送到先知部機唔啱裝或者唔啱放，客人有機會被收取額外費用換機，所以買之前謹記問清楚個sales。

到貨簽收:
簽收前記住要檢查清楚機身有無外表損毀，因為外表損位一般都不在保養服務範圍裡面。簡單咁講，簽收前責任在代理或送貨方，簽收後責任在你。

送貨時間:
幫襯小店，約實幾號送貨就易，想約實幾點送就難。客人最好預左半日時間等佢，尤其係大型電器，因為小店正常都好難掌握到送貨時間，唔係話佢地跟唔足，而係跟唔到。如日立，樂聲，惠而浦及三菱等等一線品牌，小店一般都唔會直接同代理deal，而係經由拆家叫貨，就好似隔左重山咁，想問幾點鐘送到，有難度! Confirm到係約定日期送到貨，都已經合格，答到你上午送定下午送，就已經係B+。如果客人４點前都未收到送貨電話，就要認真Chur下，因好大機會拆家或代理漏單。

安裝費用:
買之前要傾清楚安裝包乜，例如裝窗口式冷氣機，包唔包架、拆機及清走……等等。如果師傅上到黎突然話要加呢樣又加嗰樣，客人就要即刻打返去鋪頭問清楚，唔好比左錢之後先追討，因為分分鐘連鋪頭都唔清楚師傅有收取左額外費用。

最後總結一下, 小店有小店生存嘅難處，唔係話小店就一定服務差啲, 而係小店好多時候都無話事權, 就算幫你向代理或者拆家落左單, 如果佢地唔覆又或者原來佢地漏左單, 小店都無能為力。希望大家比多少少包容, 不過如果個間舖頭全程態度都唔好, 十問九唔應, 每個消費者都有權投訴!